Urtijëi, 27.04.2025

L Cor di Jëuni Gherdëina à fat pea l cuncors di cores "Vox Lucensis" a Lucca

Cun 3 cunzerc nce te Südtirol

De reviers dala Toscana cun n diplom d'or tla mans

Vint cores da 15 nazions dl'Europa se à abinà a mez auril a Lucca, n ucajion di cuncors nternaziunel di cores »Vox Lucensis«. L Cor di Jéuni Gherdeina à pudù purté a cësa na bela esperienza y n diplom d'or de livel V

N dumënia passeda iel stat per ntant l ultim di trëi cunzerc dl Cor di Jëuni Gherdëina cun l prugram atuel. Prugram che à valù dassënn, nia mé pra i cunzerc, ma nce a livel de cuncors: l Cor di Jëuni Gherdëina à arjont n resultat ezelënt cun la cianties purtedes dant pra l cuncors nternaziunel di cores a Lucca, tla Toscana. »Àn bele fat ora dan n ann te cunsëi de ulëi fé pea pra chësc cuncors y ala fin de agost ons scumencià cun la proes, dant cun proes genereles y pona cun proes al detail. L Cor di Jëuni Gherdëina fej bele dal 2012 inant for inò pea pra n majer proiet, pra n viac cun cuncors: l iede dant fans per ejëmpl tla Svezia tl 2023«,nscila l presidënt dl Cor di Jëuni Gherdëina Ivan Kostner. Te chësta maniera à l Cor di Jëuni Gherdëina fat pea pra la cuarta edizion dl cuncors nternaziunel di cores »Vox Lucensis« dai 12 ai 16 de auril a Lucca. Chësc festival de cin’ dis, urganisà dala lia zënza fin de davani Interkultur, ova coche fin prinzipel chël de ti dé la puscibltà ai cores de duta la nazions de se ancunté, de cianté deberieda y de se giamië ora ideies.

»Tenì pea cun i miëures«

Scumencià à l festival cun na defileda de duc i partezipanc, pra chëla che l fova da udëi nce la bandiera ladina. Do la proes de n dumënia, à l Cor di Jëuni Gherdëina n lunesc fat pea pra l cuncors tla categuria di cores mescedei de livel I, che ie l livel plu aut. Tl conservatorium »Luigi Boccerini« à l Cor di Jëuni arjont n resultat ezelënt: la 47 ciantarines y ciantarins de Gherdëina à giapà 25,38 ponc, che curespuend a n diplom d’or a livel 5. »N resultat scialdi bon, on udù che pudon tenì pea cun i miëures, che à ala fin dla finedes arjont mé un n pont plu che nëus«, nscila Kostner.

Nia da capì

La cater cianties purtedes dant pra l cuncors fova »Sing Joyfully« de William Byrd, »The Heaven’s Flock« de Ēriks Ešenvalds, l pez de Jake Runestad »Nyon Nyon« y la ciantia per ladin »Nia da capì« de Johanna Kostner cun aranjamënt de Samuel Runggaldier. Chëst’ultima ciantia à abù n suzes particuler. L se trata de n pez che ie unì scrit aposta y che dë fé pensé do a na maniera critica sun la vieres y sun l ntervënt de ermes scialdi tecnologiches. La ciantia scumëncia cun na sirena che sona, fata do a usc y ie na cundana ala vieres sun chësc mond.

Gran Prix

Oradechël à l Cor di Jëuni nce fat pea pra n cunzert de amezizia cun n cor dala Irlanda y n cor dl Vorarlberg. »Cie che nes à fat scialdi plajëi ie che ala fin nes ài cris ora per cianté pea pra l Gran Prix, cie che ie stat per nëus velch de nuef, velch che ne n’àn mo mei fat. N chësta ucajion ons pudù purté dant doi pec, che ne daussova nia vester i medemi dl cuncors, dan ades 1000 persones danter ciantarins y ascutadëures tl auditorium de San Franzësch«, nes à cuntà Kostner. L Cor di Jëuni Gherdëina à nscila pudù dé ëuta a cësa cun na bela sudesfazion y dantaldut na bela esperienza fata n cumpanía, cie che fej dessegur bon al spirt de grupa.

Lingia de cunzerc ncësa

I pec prejentei al cuncors y nce d’autra cianties mparedes ite ntan i mënsc passei, àn pudù audì pra i trëi cunzerc metui a jì tl Sudtirol tl mëns de auril, tla dliejes de Santa Cristina, de Unterinn sun l Renon y de Urtijëi. Pra duc i cunzerc iel unì adalerch truepa jënt, curiëusa de scuté su i pec purtei dant pra l
cuncors. L prugram fova scialdi rich cun ndut dodesc cianties. L fova da audì n pez plu antich che va de reviers al 1500, truep spirituals, ma nce pec africans nchin a chëi plu moderns. N cont di proiec dl daunì ne savova l presidënt mo nia da nes dé nfurmazions, l nes à dit che »al mumënt fajons na majera paussa, de viers dla fin dl instà fajerons pona ora coche la jirà inant, ma l unirà dessegur inò a s’l dé velch de bel«.


Nathalie Stuffer - La Usc di Ladins